2021 йил 17 ноябрь куни «Ўзтоқимачиликсаноат» уюшмаси раҳбариятининг Кореяга ташрифи доирасида Кореянинг POSCO International компанияси вакиллари билан учрашуви бўлиб ўтди. Учрашувда Ўзбекистонда пахта-тўқимачилик кластерини яратиш ва мавжуд ишлаб чиқаришни модернизация қилиш истиқболлари муҳокама қилинди.
Корея томони Ўзбекистонга яқин 2 йилда янги сармоя киритишга, уларни пахта ва мойни қайта ишлаш заводи қуриш билан пахта-тўқимачилик кластери лойиҳасини амалга оширишга ва синтетик хомашёдан фойдаланган ҳолда тўқимачилик фабрикасини модернизация қилишга йўналтиришга тайёрлигини билдирди. Шунингдек, компания PET чиқиндиларини қайта ишлаш, кейинчалик улардан тўқимачилик толалари ишлаб чиқаришда фойдаланиш лойиҳасини амалга оширишдан ҳам манфаатдор.
Юқоридагилар билан бир қаторда, компания вакиллари тўқимачилик саноатида мутахассислар тайёрлаш бўйича ўқув марказини ташкил этиш лойиҳаси амалга оширилаётганини маълум қилди.
Томонлар икки томонлама ҳамкорлик бўйича таклифлар алмашдилар, хусусан, кореялик ҳамкорларга Корея-Ўзбекистон тўқимачилик технопарки негизида ҳамкорлик қилиш ва қўшма ишларни ташкил этиш таклиф этилди.